Borgaryfirvöld í Osló hafa ráðið starfsmann sem mun hafa það eina hlutverk að uppræta einelti meðal barna í skólum borgarinnar. Um er að ræða nýjung í Noregi en áður hafði tilraunaverkefni gefið góða raun.

Starfsmaðurinn sem mun hafa yfirumsjón með málaflokknum heitir Kjerstin Owren og er fyrrverandi aðstoðarskólastjóri í grunnskóla einum í Osló. Hún var ráðin úr hópi 116 umsækjenda, að því er norskir fjölmiðlar greina frá.

Óhætt er að segja að starfið sem Kjerstin tekur að sér sé viðamikið en hún mun halda fyrirlestra fyrir nemendur í leik- og grunnskólum borgarinnar, gefa skólastjórnendum ráð um hvernig er best að standa að fyrirbyggjandi fræðslu gegn einelti og verða foreldrum þeirra barna – og börnunum sjálfum – sem sæta einelti innan handar.

Í samtali við NRK segir Kjerstin að markmið hennar sé að verða aðgengileg fyrir alla nemendur í Osló.

„Ég þarf að vera sýnileg. Það verður að vera auðvelt fyrir börnin og unga fólkið að komast í samband við mig og hvaða þætti þau geta fengið ráðleggingar um,“ segir hún.