Enginn þingmanna Viðreisnar né Bjartrar framtíðar tók til máls í tveimur sérstökum umræðum á Alþingi í dag. Í umræðunum var annars vegar fjallað um skýrslu um niðurfærslu verðtryggðra fasteignalána, Leiðréttingarskýrsluna svokölluðu, og hins vegar um skýrslu um eignir Íslendinga á aflandssvæðum.

Fjarvera þingmanna tveggja af þremur stjórnarflokkum í umræddum umræðum hefur vakið athygli á samfélagsmiðlum í dag. Hart hefur verið deilt á Bjarna Benediktsson forsætisráðherra að undanförnu vegna þess að skýrslurnar tvær voru ekki birtar fyrir kosningar á síðasta ári. Skýrslurnar voru unnar fyrir fjármála- og efnahagsráðuneytið, sem Bjarni stýrði á síðasta kjörtímabili, og voru tilbúnar fyrir kosningarnar 29. október síðastliðinn. Þrátt fyrir það voru þær ekki birtar fyrr en á þessu ári.

Þetta hafa stjórnarandstæðingar gagnrýnt harðlega að undanförnu. Í umræðunum í dag var Bjarni Benediktsson til svara og mátti þola gagnrýni þingmanna úr öllum stjórnarandstöðuflokkunum. Þingmenn Bjartrar framtíðar, sem voru í stjórnarandstöðu á síðasta kjörtímabili þegar óskað var eftir skýrslunum, komu hins vegar ekki í ræðustól í dag. Hið sama má segja um þingmenn Viðreisnar sem ekki tjáðu sig um málið.