„Okkur foreldrunum þætti vænt um ef fjölmiðlar myndu sýna okkur tillitssemi við útför Birnu á föstudaginn og taka ekki ljósmyndir á meðan jarðarförinni stendur,“ sögðu Brjánn Guðjónsson og Sigurlaug Hreinsdóttir í samtali við DV í gær. Útför Birnu fer fram næstkomandi föstudag. Athöfnin fer fram í Hallgrímskirkju klukkan 15:00. Segja foreldrarnir að með þessari ábendingu hafi þau átt við að fjölmiðlar tækju ekki nærmyndir af ættingjum að syrgja Birnu í Hallgrímskirkju.
Foreldrar Birnu hafa lifað sínu erfiðustu daga síðustu vikur en þau eru afar þakklát landsmönnum fyrir að styðja við bakið á fjölskyldunni. Útförin verður opin en í samtali við DV í gær sögðu Sigurlaug og Brjánn að þau vildu síður að það yrði tekin mynd af þeim að syrgja Birnu. Það væri óþægileg tilhugsun og það myndi hjálpa þeim á þessum erfiðu tímum ef fjölmiðlar gætu virt það.
Sigurlaug, Brjánn og Logi Fannar bróðir Birnu birta sameiginlega yfirlýsingu á Facebook-síðu Sigurlaugar í dag. Þar taka þau fram að „þar sem allir landsmenn hafa tekið þátt í leit að Birnu á einn eða annan hátt og tekið þátt í sorg okkar að þá höfum við fullan skilning á því að fjölmiðlar fjalli um jarðarförina og taki myndir og viljum vera í góðu og fallegu samstarfi við fjölmiðla eins og hefur verið frá byrjun.“
Við þetta bætir Sigurlaug:
„Við erum einungis að biðja um að ekki verði teknar nærmyndir af nánustu aðstandendum, fjölskyldu og vinum, syrgja.“
Erfidrykkjan fer fram í flugskýli Landhelgisgæslunnar sem er á Reykjavíkurflugvelli strax eftir athöfnina. Segir Sigurlaug að þangað séu allir velkomnir.
„Fólki er bent á að leggja bílum sínum við Nauthólsvík og Landhelgisgæslan mun ferja gesti frá bílastæði að flugskýlinu.“
