Allt frá því lýst var eftir Birnu Brjánsdóttur áttu Íslendingar eina heita ósk, þá að hún fyndist á lífi. Fjölmargir leituðu Birnu í fjölmennustu leit í sögu björgunarsveita landsins. Þeirri leit lauk með líkfundi. Öll þjóðin er harmi slegin og syrgir góða og lífsglaða stúlku. Og ekki bara íslenska þjóðin, heldur einnig vinaþjóð okkar, Grænlendingar. Á Grænlandi hefur Birnu verið minnst og kveikt á kertum í minningu hennar. Grænlendingum líður skiljanlega illa vegna málsins og vonandi berum við flest þann þroska að kenna ekki grænlenskri þjóð um voðaverk sem grænlenskur einstaklingur eða einstaklingar kunna að hafa framið.

Á þessum erfiðu dögum höfum við enn einu sinni orðið vitni að því hversu mikil þrekvirki björgunarsveitir landsins vinna, þar er ríkjandi áberandi ósérhlífni, dugnaður og fórnfýsi. Aldrei er gefist upp heldur haldið áfram. Fjölmargir einstaklingar tóku sig svo til og hófu leit upp á eigin spýtur, án þess að vita hvar ætti nákvæmlega að leita. Þeir gátu einfaldlega ekki hugsað sér að sitja aðgerðarlausir heldur vildu leggja sitt af mörkum.

Lögregluyfirvöld hafa staðið sig gríðarlega vel í einstaklega erfiðu og sorglegu máli. Talsmenn lögreglu hafa upplýst fjölmiðla og almenning eftir því sem hægt er og sýnt fagmennsku og yfirvegun sem hefur áunnið þeim virðingu þjóðarinnar. Fjölmiðlar hafa sagt ítarlega frá málinu og vonandi hefur sá fréttaflutningur ekki sært aðstandendur.

Stundum hefur verið sagt um Íslendinga að þeir séu sundurlynd og þrætugjörn þjóð og vissulega eigum við til að opinbera það alltof oft. En það hefur líka sýnt sig að Íslendingar eiga ekki í neinum erfiðleikum með að standa saman sem einn maður, bæði á gleði- og sorgarstundum. Að þessu sinni sameinast landsmenn í sorginni. Það er óendanlega dapurlegt að ung stúlka sem framtíðin virtist brosa við skuli skyndilega og alls óvænt hafa verið hrifsuð burt á svo grimmilegan hátt. Sorgin verður allsráðandi.

Það er mikilsverður eiginleiki að geta sýnt samkennd og það hefur íslenska þjóðin gert á afar fallegan hátt undanfarna daga. Um leið erum við minnt á hversu miskunnarlaus heimurinn getur verið, þar eru þeir ungu og saklausu alltof oft fórnarlömb.

DV sendir foreldrum og aðstandendum Birnu Brjánsdóttur innilegar samúðarkveðjur. Missir þeirra er óendanlega sár og mikill. Þjóðin syrgir með þeim.