Ráðuneyti innanríkismála verður skipt upp í tvö aðskilin ráðuneyti og verða ráðuneytin því níu í stað átta eftir breytinguna. Þetta staðfesti Sigríður Á. Andersen dómsmálaráðherra við Morgunblaðið í dag.
Eftir breytinguna verða dómsmálin aðskilin frá innanríkisráðuneytinu. Sigríður sagði á Morgunvaktinni á RÚV í morgun að mikil vinna sé framundan við að bæta við einu dómstigi hér á landi.
„Löggæslan verður alltaf mikilvægari og mikilvægari og mæðir meira á henni. Ég tala nú ekki um eftir að þessi hælisleitendamál komu upp. Þá erum við sammála um að það sé meiri bragur á því að hafa dómsmálin aðskilin frá samgöngumálunum,“ sagði Sigríður en dóms- og kirkjumálaráðuneytið var sameinað samgönguráðuneytinu þegar ráðuneytum fækkaði á þarsíðasta kjörtímabili. Ráðuneytið tók til starfa í ársbyrjun 2011.
Í Morgunblaðinu í dag kom fram að starfshópi um framkvæmdina hefði verið komið á fót, en Sigríður segir við blaðið að sú vinna ætti ekki að taka langan tíma.