Umtalsverðan raka og myglu er að finna í Laugarnesskóla. Þetta kom í ljós í desember eftir að Reykjavíkurborg gerði úttekt á húsnæðinu. Nokkrir starfsmenn skólans hafa kvartað undan óþægindum í öndunarfærum og aðstoðarskólastjóri Laugarnesskóla er kominn í veikindaleyfi vegna langvarandi veikinda sem rekja má til lélegra loftgæða á skrifstofu hans.

Loftgæði í skrifstofuálmu slæm

Sigríður Heiða Bragadóttir, skólastjóri Laugarnesskóla, segir í samtali við DV að hún hafi þær væntingar til borgarinnar að ráðist verði í framkvæmdir til að bæta skemmdirnar sem eru í stjórnunarálmu skólans sem allra fyrst.

Loftgæði í kennslustofum og rými þar sem nemendur halda til eru enn sem komið er góð.

„Tveir starfsmenn hafa átt erfitt með að vinna hérna. Við fundum enga skýringar á því fyrr en við fengum niðurstöðurnar sem sýna að loftgæði þar sem skrifstofurnar okkar eru eru mjög slæm“

Í bréfi sem Sigríður Heiða sendi foreldrum og forráðamönnum nemenda í Laugarnesskóla í dag segir meðal annars að á undanförnum árum hafi á nokkrum stöðum í skólanum orðið vart við leka í votviðrum.

Umfangsmikil viðgerð

„Raki getur haft áhrif á loftgæði og hafa nokkrir starfsmenn skólans kvartað yfir óþægindum í öndunarfærum og því óskaði ég eftir að Reykjavíkurborg skoðaði húsnæði skólans og sérstaklega austurálmuna sem var gerð upp fyrir níu árum.“

Sigríður Heiða segir að loft- og snertisýni hafi verið tekin á nokkrum stöðum í skólanum og rakamælingar framkvæmdar. Niðurstöður sýndu að loftgæði í stjórnunarálmu skólans og í fundarherbergi á 3. hæð eru slæm vegna langvarandi leka með gluggum og múr. Mælingar á öðrum svæðum voru innan eðlilegra marka.

„Ljóst er að það þarf að ráðast í aðgerðir til að stöðva lekann og hreinsa út skemmt byggingarefni í stjórnunarálmunni. Um er að ræða umfangsmiklar aðgerðir og verið er að vinna aðgerðaráætlun á þessu stigi en ég hef þær væntingar til minna yfirmanna að þetta verði forgangsmál með öryggi og heilsufar nemenda og starfsfólks að leiðarljósi.“