Stjórnendur Bland.is hafa tekið þá ákvörðun að hætta með vefsvæðið Barnaland. Notendur eru því minntir á að hafa varann á og vista hjá sér þær ljósmyndir sem þeir hafa hlaðið niður á síðuna.

Þetta kemur fram í tilkynningu sem Bland.is sendir á notendur sína í dag. Barnaland hefur hingað til verið stærsta heimasíðusvæði Íslands fyrir börn og vinsælt meðal foreldra að vista þar og deila myndum af afkomendum sínum við hin ýmsu tilefni.

„Á næstu dögum munum við hætta með Barnaland, þ.e gömlu heimasvæðin sem hugsuð voru fyrir barnamyndir o.þ.h. Við höfum þó ekki eytt neinum gögnum og þú getur hlaðið niður öllum myndunum þínum með því að smella hér – Við munum hins vegar eyða öllum gögnum eftir 90 daga, frá og með deginum í dag, 13. júní,“ segir í tilkynningunni.

Þá kemur jafnframt fram að um sé að ræða afmarkað vefsvæði, en smáauglýsingasölusíða vefsins verður áfram starfrækt. „Við munum hins vegar eftir sem áður halda úti stærsta íslenska sölutorginu, með það að markmiði að tengja saman kaupendur og seljendur.“