Þorvaldur Lúðvík Sigurjónsson, sem hlaut 18 mánaða fangelsisdóm í STÍM-málinu svokallaða, segist hafa verið ranglega dæmdur og að ákæruvaldinu hafi verið misbeitt grímulaust gegn sér. Líkir hann malsmeðferðinni við Geirfinns- og Guðmundarmálin og Hafskipsmálið.

Þorvaldur starfaði sem bankamaður á árunum 1996-2010 og var um tíma forstjóri Saga Capital. Hann ritar harðorða grein um dóminn og málatilbúnaðinn allan gegn sér í Fréttablaðið í dag. Þar segir meðal annars:

Eftir fimm ára bið féll dómur í Stím-málinu í héraðsdómi Reykjavíkur rétt fyrir jól. Samkvæmt dómi skal ég sæta 18 mánaða fangelsisvist vegna brota er ku hafa átt sér stað fyrir átta árum í öðrum banka en ég starfaði hjá. Mér er reyndar ókunnugt um að þessi brot hafi átt sér stað, en þau voru ósönnuð með öllu. Ég áfrýjaði dóminum samdægurs til Hæstaréttar og mun líklega þurfa að bíða í eitt og hálft ár eftir málsmeðferð þar. Af lestri dómsins er erfitt að sjá að réttarhald hafi farið fram eða að einhvers konar málsvörn hafi átt sér stað.

Þorvaldur segir enn fremur í greininni:

Í fimm ár hef ég mátt þola símhleranir; upptöku persónulegra gagna; húsrannsókn; mannorðsmissi og skert lífsviðurværi. Að óþörfu og ósekju.

Segir Þorvaldur að dómurinn gegn sér byggi á fyrirframgefinni niðurstöðu og hann kunni að vera til marks um að réttarkerfið hafi ekki lært nóg af fyrri mistökum í Geirfinns- og Guðmundarmálinu og í Hafskipsmálinu. Um hlut sinn í STÍM-málinu segir Þorvaldur:

Ég fullyrði að niðurstaðan í Stím-málinu er röng. Ég gerði ekkert rangt og myndi breyta eins í sömu aðstæðum aftur. Ég get harmað að hafa borist á öldum bjartsýni fyrir 2008, en mögulega voru fleiri sekir um það. Gjaldið hefi ég greitt og það ríflega. Að ég hafi gerst sekur um afbrot er fráleitt.