Mark David Chapman, banamanni Bítilsins Johns Lennon, var á dögunum synjað um reynslulausn. Tæp 36 ár eru síðan Chapman skaut Lennon til bana fyrir utan Dakota-íbúðabygginguna í New York.

Skilorðsnefnd tók beiðni Chapmans fyrir á dögunum og er skemmst frá því að segja að henni hafi verið synjað. Chapman var dæmdur í lífstíðarfangelsi fyrir morðið, en hann gat sótt um reynslulausn eftir að hafa setið í fangelsi í 20 ár.

Chapman, sem er 61 árs, hefur alls níu sinnum óskað eftir reynslulausn en ávallt verið hafnað. Þriggja manna skilorðsnefnd fór yfir beiðnina, en ekki fæst uppgefið á hvaða forsendum henni var hafnað.

Þetta þýðir að Chapman verður á bak við lás og slá næstu tvö árin hið minnsta, en þá getur hann að nýju sótt um reynslulausn.