„Sem níu barna móðir má ég ekki til þess hugsa að geta ekki eignast börn,“ segir Michelle Hearnden, 47 ára gömul áströlsk amma, sem hyggst ganga með og fæða fjórða barnabarnið sitt. Sonur hennar, Dan, og tengdadóttir, Kyia, misstu sex mánaða gamla dóttur sína; fyrirbura sem vó aðeins 620 grömm þegar hún fæddist. Hún lést í fyrra eftir að hafa glímt við krónískan lungnasjúkdóm.

Í kjölfar áfallsins var Kyia Kuiper greind með antiphospholipid heilkenni, en um er að ræða truflun á ónæmiskerfinu sem einkennist af ofstorknun á blóði og eða endurteknum fósturlátum. Henni hefur verið gert ljóst að frekari tilraunir til barneigna geti reynst henni lífshættulegar.

Parið sá ekki fram á að geta átt barn þegar móðir Hearnden bauðst til að gerast staðgöngumóðir barnsins. Sjálf gekk hún með níu börn. En tæknifrjóvgun er kostnaðarsöm. Parið hefur efnt til söfnunnar á GoFundMe.com þar sem markmiðið er að safna 15 þúsund dollurum, eða 1,7 milljón króna. Þegar þetta er skrifað hafa aðeins safnast 1.860 dollarar. „Við drögum fram lífið á einum launum en greiðum af íbúðar- og bílaláni. Við getum ekki safnað þessu á eigin spýtur. Mamma er að nálgast fimmtugt svo það væri hentugt ef þetta gengi hratt og vel fyrir sig,“ skrifar Dan á vefsíðuna.