Lögreglunni á höfuðborgarsvæðinu bárust 27 tilkynningar um kynferðisbrot sem áttu sér stað í júlímánuði. Ekki hafa borist jafn margar tilkynningar um kynferðisbrot sem áttu sér stað í einum mánuði síðan í ágúst 2013.
Í skýrslu um afbrotatölfræði lögreglustjórans á höfuðborgarsvæðinu fyrir júlímánuð 2016 kemur fram að borist hafi 15 tilkynningar vegna nauðgana í mánuðinum og sjö tilkynningarvegna blygðunarsemisbrota. Það sem af er ári hafa tilkynningar um kynferðisbrot þó verið um 13 prósent færri miðað við meðalfjölda fyrir sama tímabil árin 2013 til 2015.
Þá voru skráðar voru 688 tilkynningar um hegningarlagabrot á höfuðborgarsvæðinu, sem er fjölgun á milli mánaða. Þá bárust 306 tilkynningar um þjófnaði sem gerir um 44 prósent allra tilkynntra hegningarlagabrota í júlí. Er þetta svipaður fjöldi tilkynninga og síðustu tvo mánuði á undan.