Jack og Jordan gleymdu að læsa – Innbrotsþjófurinn nýtti sér það
Óhætt er að segja að Jordan Buranskas og Jack Mackercher hafi fyllst skelfingu þegar þau skoðuðu myndband úr eftirlitsmyndavél á heimili sínu í Chicago í Bandaríkjunum á dögunum.
Atvikið átti sér stað aðfaranótt mánudags en þau Jack og Jordan höfðu sofnað í sófanum yfir sjónvarpinu þegar innbrotsþjófur braust inn á heimili þeirra. Íbúð þeirra er í nokkurra hæða fjölbýlishúsi og virðist þjófurinn hafa komist inn í gegnum ólæstar dyr á svölum.
Eins og sést á meðfylgjandi myndbandi stóð þjófurinn yfir þeim í drykklanga stund og virtist hann hafa verið að fylgjast með parinu – þó sjónvarpsþátturinn Mr. Robot í sjónvarpinu virðist einnig hafa vakið athygli hans. Hann stóð efst í stiganum í samtals fimmtán mínútur áður en hann hafði sig á brott.
Jordan og Jack höfðu ekki hugmynd um að maðurinn hefði brotist inn og hefðu að líkindum aldrei áttað sig á því ef ekki væri fyrir eftirlitsmyndavél sem þau nota til að fylgjast með tveimur hundum sem eru á heimilinu. Daginn eftir fann Jordan ekki veskið sitt og ákváðu þau að skoða upptökuna til að kanna hvort Jordan hefði verið með veskið með sér þegar hún kom heim fyrr um kvöldið. Það var þá sem þau sáu manninn. Jack taldi fyrst að maðurinn í stiganum væri Jordan.
„Ég spurði hana hvers vegna í ósköpunum hún hefði klætt sig í hvíta hettupeysu áður en við fórum að sofa. Þá svaraði hún að bragði að hún kannaðist ekki við það. Þá brá okkur svolítið,“ segir Jack.
Þau Jack og Jordan venja sig á að læsa dyrunum á svölunum en þetta kvöld segjast þau einfaldlega hafa gleymt því. Engu öðru en veski Jordan var stolið. Innbrotsþjófurinn er ófundinn þegar þetta er skrifað.
