Það var heldur betur lukkuleg og ánægð kona sem kom til Getspár í morgun með annan tveggja vinningsmiða frá því síðasta laugardag.
Í tilkynningu frá Getspá kemur fram að konan fór í Álfinn Kópavogi síðasta föstudag og ætlaði að versla sér eina röð í EuroJackpot, en henni til happs þá var búið að loka fyrir sölu þar sem klukkan var orðin 17. Notaði hún peninginn sem hún var með og keypti sér tvær raðir í Lottó í staðinn.
„Í gær fór hún svo aftur í Álfinn til að versla og rakst þá á Lottómiðann í veskinu og lét renna honum í gegn. Vinningshljóð kom þegar miðanum var rennt í gegnum sölukassann og þá sagði konan: „Vei – ég á þá fyrir öðrum lottómiða“.
Afgreiðslumaðurinn leit á hana og sagði: „Ég held að þú ættir að setjast niður.“ Því næst rétti hann henni vinningsmiðann og undirstrikaði vinningsupphæðina sem var 54,8 milljónir.
Konan var mjög spennt og ánægð en svaf samt vel í nótt og ætlar að nota vinninginn til að kaupa sér hús og hund, að því er segir í tilkynningunni. Einnig ætlar hún að bjóða allri fjölskyldunni með sér í gott frí til útlanda en konan missti allt sitt í hruninu og er búin að vera á rándýrum leigumarkaði.
Við óskum þessum heppna vinningshafa innilega til hamingju með þennan glæsilega vinning um leið og við biðjum alla sem versluðu sér Lottómiða í 10-11 við Kleppsveg að athuga með sinn lottómiða því hann hefur ekki enn gefið sig fram