Héraðsdómur Reykjavíkur hefur sakfellt tvo karlmenn fyrir stórfelldan þjófnað á eldsneyti frá Atlantsolíu. Annar mannanna var dæmdur í níu mánaða fangelsi og eru sex mánuðir dómsins skilorðsbundnir. Hinn var dæmdur í sex mánaða fangelsi og eru fjórir mánuðir skilorðsbundnir.

Sá sem hlaut þyngri dóminn var ákærður fyrir að hafa á tímabilinu 20. júní 2013 til 5. mars 2014 stolið eldsneyti í alls 33 tilvikum fyrir um 385 þúsund krónur frá sjálfsafgreiðslustöð Atlantsolíu við Búðarkór í Kópavogi. Opnaði maðurinn læst hólf á eldsneytisdælu með lykli sem hann hafði haft undir höndum frá því að hann vann á tæknideild félagsins.

Aftengdi maðurinn svokallaðan eldsneytisteljara fyrir dæluna en að því loknu notaði hann greiðslukort í sjálfsala og greiddi lága fjárhæð til félagsins, eða þúsund krónur. Komst maðurinn þar með yfir margfalt meira eldsneyti en hann hafði greitt fyrir í hvert og eitt sinn. Í kjölfarið setti hann eldsneyti á bifreiðar í sinni eigu og annarra og eftir atvikum á eldsneytisbrúsa.

Báðir voru mennirnir svo í sameiningu ákærðir fyrir að hafa á tímabilinu 16. maí 2013 til 10. mars 2014 stolið eldsneyti í alls 68 tilvikum fyrir rúmar fimm milljónir. Maðurinn notaði sömu aðferð við þjófnaðinn en í þessum tilvikum stálu mennirnir miklu magni, stundum yfir 400 lítrum í einu, sem þeir dældu á tunnur.

Í heildina var um að ræða þjófnað á rúmlega tuttugu þúsund lítrum af eldsneyti. Sá sem hlaut vægari dóminn lagði til sendibifreið og sá þannig um flutning á tunnum og brúsum á vettvang.

Mennirnir játuðu báðir sök fyrir dómi.