Ung stúlka, 17 ára gömul, sem grunuð er að hafa ekið undir áhrifum áfengis endaði ferð sína inni í garði í Hafnarfirði. Endaði bílinn á hvolfi en DV greindi frá málinu í morgun. Fjórir unglingar voru í bílnum og sluppu þau án teljandi meiðsla.
Sif Björnsdóttir tók myndir af bílnum í nótt sem endaði ferð sína í garði fjölskyldu hennar. Sif segir á Facebook síðu sinni í stuttri hugvekju:

„Þetta er fyrir alla þá sem hafa einhver tímann sest undir stýri undir áhrifum áfengis og fyrir alla þá sem halda því fram að það sé í lagi að setjast undir stýri undir áhrifum áfengis. Í nótt gerðist einmitt það að drukkin manneskja velti bíl inní garð fjölskyldunnar minnar. Sem betur fer meiddist enginn, en það er bara heppni.“

Sif bætir við:

„Við erum fámenn þjóð og í hvert skipti sem að einhver lætur lífið í umferðarslysi þá syrgir öll þjóðin.“

Þá segir Sif að endingu:

„Mörg okkar keyra framhjá skilti á hverju ári sem að sýnir okkur hversu margir hafa látið lífið í umferðarslysi á því ári. Það gæti verið að við munum aldrei sjá töluna núll á skiltinu en við getum reynt að minnka töluna með því að setjast ekki undir stýri undir áhrifum.“