Sigmundur Davíð segir það ekki satt sem Ólafur Ragnar Grímsson sagði við fjölmiðlamenn fyrr í dag að hann hafi beðið um þingrof. Sagðist hann hann hafa greint forseta frá því að hann hyggðist leggja til að þing yrði rofið og boðað til kosninga ef í ljós kæmi að stjórnin hefði ekki lengur meirihluta á þingi.

Þetta kemur fram í tilkynningu á vef Forsætisráðuneytisins. Tilkynningin er svohljóðandi:

Forsætisráðherra og forseti Íslands áttu fund á Bessastöðum nú laust fyrir hádegi í dag. Á fundinum upplýsti forsætisráðherra forseta um stöðu mála í stjórnmálum hér á landi og greindi jafnframt frá áformum sínum um að leggja til við forseta að þing yrði rofið og boðað yrði til almennra alþingiskosninga ef í ljós kæmi að meirihluta stuðningur við ríkisstjórnina væri brostinn. Formleg tillaga um þingrof var hvorki borin upp á fundinum né kynnt forseta eins og skilja mátti af ummælum forseta Íslands að fundi loknum. Forsætisráðherra tjáði forseta að hann hyggðist bera þingrofstillögu formlega upp við forseta ef niðurstaða um framangreint lægi fyrir.