„Ég held að þetta hafi ekkert að gera með umhverfið. Ég held að það hafi ekkert að gera með hreina loftið, vatnið og fiskinn,“ segir Kári Stefánsson í samtali við fréttavef NBC og á þar við lykilinn að langlífi Íslendinga. Í umræddri grein NBC kemur fram að Íslendingar séu þekktir fyrir stórbrotið landslag og útisundlaugar en ekki síður þá staðreynd að meðaldánar aldur er 83 ár.

NBC ræðir einnig við Stefán Þorleifsson frá Neskaupsstað sem fagnar 100 ára afmæli sínu á árinu. Fram kemur að Stefán hefji hvern einasta morgun á því að fá sér sundsprett, stundi síðan líkamsrækt með öðrum eldri borgurum og snæði síðan hádegisverð sem samanstandi af íslenskum réttum. „Við borðum ekki mikið kjöt, við borðum miklu meiri fisk,“ segir Stefán í samtali við bandarísku fréttamennina um leið og hann gæðir sér á hákarli, hrútspungum og sviði. Velt er upp þeirri spurningu hvort Íslendingar getið þakkað langlífið hinu undarlegu mataræði eða umhverfinu. Á Íslandi sé lítil mengun og þá snæði Íslendingar mikið af fiski sé sem fullur af omega 3 fitusýrum.

Þá er einnig rætt við Kára Stefánsson, stofnanda DeCode sem fullyrðir að langlífi Íslendinga stafi af sögu erfðaefnis þjóðarinnar og því hvaða fólk ákveði að eignast börn. Umhverfið og maturinn hafi ekki áhrif. Þá nefnir hann sem dæmi að rannsakendur hafi uppgvötvað genafbrigði sem hafi áhrif á nikótínfíkn. „Heilinn í þér hefur verið fastmótaður af erfðaefni þínu. Erfðaefnið ákveður að miklu leyti hvað þú gerir og hvernig þú gerir það. Þannig að frjáls vilji er ekki mikill.“

„Það er enginn Guð, það er aðeins DNA. „Það er ýmislegt sem við erum fær um að gera, en við verðum að vera meðvituð um að við erum alltaf að berjast við okkur sjálf, til þess að koma í veg fyrir að erfðafræðileg örlög okkar verði að raunveruleika,“ segir Kári jafnframt.