Þrír ástralskir karlmenn hafa játað að hafa nauðgað sautján ára norskri stúlku á bar í borginni Split í Króatíu. Þó að mennirnir hafi játað að hafa nauðgað stúlkunni verða engin réttarhöld í málinu. Lögmenn mannanna komust að samkomulagi við saksóknara um að greiða stúlkunni bætur, tæpar fjórar milljónir króna, gegn því að fallið yrði frá ákæru.

Atvikið átti sér stað þann 16. júlí í Split í fyrrasumar, en stúlkan hafði kynnst mönnunum fyrr um daginn á ströndinni. Um kvöldið fóru þau út að skemmta sér og á bar í borginni reyndu mennirnir að nauðga henni. Meðal sönnunargagna í málinu var sæði úr öllum mönnunum sem fannst á fötum stúlkunnar.

Vegabréf mannanna voru tekin af þeim þegar málið kom upp, en mennirnir sem um ræðir heita Dylan Djohan, 23 ára, Ashwin Kumar, 23 ára og Waleed Latif, 21 árs. Þeir hafa dvalið í Króatíu undanfarna sjö mánuði meðan beðið var réttarhalda en nú eru mennirnir komnir aftur til Ástralíu eftir að samkomulag náðist.

Í umfjöllun Mail Online kemur fram að einn mannanna Dylan Djohan hafi tilkynnt á Facebook þann 3. febrúar síðastliðinn að hann væri væntanlegur aftur til Ástralíu. Ýjaði hann að því að hann ætlaði sér að komast í hinn svonefnda háloftaklúbb með flugfreyju á leið sinni heim. Á mynd af sér sem tekin var í Dubrovnik sagði hann að tilgangur hans í lífinu væri að „sænga hjá fallegum konum“.