IKEA verslanir um allan heim eru nú að innkalla bláa og rauða MATVRÅ smekki vegna mögulegrar köfnunarhættu.

IKEA á Íslandi greinir frá þessu á vefsíðu sinni og eru ýmsir fjölmiðlar um heim allan að vekja athygli á málinu.

Verslunin hvetur viðskiptavini sem eiga smekkina, sem eru seldir tveir í pakka, til að taka þá tafarlaust úr notkun og skila þeim í IKEA. Þeir verða að fullu endurgreiddir.

„Vöruöryggi er gríðarlega mikilvægt hjá IKEA. Vörurnar okkar eru prófaðar og standast allar viðeigandi reglugerðir og staðla. Þrátt fyrir það hafa okkur borist tilkynningar um að tölurnar á MATVRÅ smekkum geti losnað af og valdið köfnunarhættu.

IKEA hvetur viðskiptavini sem eiga þessa vöru til að skila henni til IKEA og fá hana endurgreidda að fullu. Kvittun er ekki skilyrði fyrir endurgreiðslu,“ segir á vefsíðu IKEA Íslandi.