Instagram olli usla fyrr á þessu ári þegar samfélagsmiðillinn tilkynnti að hann ætlaði að fela „like“ fyrir notendum til þess að sporna við félagslegri pressu. Ástæðan fyrir því er að bæta upplifun notenda og bregðast við umræðu um aukna vanlíðan fólks á samfélagsmiðlinum.

Nú hefur Instagram ákveðið að gera lífið enn erfiðara fyrir áhrifavalda með því að blokka færslur um fegrunaraðgerðir og megrunarvörur fyrir notendum yngri en átján ára.

Það er ekki hægt að neita því að á Instagram eru stanslausar myndir af áhrifavöldum sem hafa fengið greitt fyrir að auglýsa allt frá varafyllingum yfir í te sem á að láta öll aukakílóin fjúka á nokkrum dögum.

En nú munu börn og unglingar, sem eru sérstaklega viðkvæm fyrir þessum auglýsingum, ekki sjá færslurnar.

„Við viljum að Instagram sé jákvæður staður fyrir alla sem nota samfélagsmiðillinn og hluti af okkar stefnu er að draga úr pressunni sem er tilkomin vegna samfélagsmiðla,“ segir Emma Collins, talsmaður Instagram.

Leikkonan Jameela Jamil hefur verið mjög gagnrýnin á stjörnur sem auglýsa megrunarvörur. Hún hefur meðal annars gagnrýnt Khloé Kardashian, Amber Rose og Kim Kardashian fyrir að auglýsa megrunarvörur eins og sleikjó sem á að minnka matarlyst.

„Eftir að hafa öskrað, gargað og skrifað undir undirskrifalista, þá höfum við fengið athygli þeirra sem eru á toppnum, þau hafa hlustað á okkur og vilja vernda okkur,“ skrifaði Jameela á Instagram.

„Þetta er aðeins byrjunin. Eins og er, ef þú ert undir átján ára, þá sérðu ekki lengur megrunar/detox vörur, og fyrir aðra aldurshópa þá verður auðvelt að tilkynna færslur þar sem haldið er fram óraunhæfum fullyrðingum um slíkar vörur. Ég hef verið að vinna með Instagram allt árið í átt að þessu markmiði, og þau voru frábær. Þau vilja skapa öruggara rými fyrir okkur á netinu.“

https://www.instagram.com/p/B2j3XdWl_lG/

Hvað segja lesendur við fréttunum?