Um páska erum við byrjuð að finna fyrir vori. Sólin hækkar á lofti og fuglasöngur magnast. Litirnir verða líka ljósari og margir kjósa að skreyta heimili sín með fallegum pastellitum sem tóna vel við birtuna. Ásta Hermannsdóttir bloggari á Ynjum birti skemmtilega lýsingu á því hvernig hún bjó til falleg marmaraegg fyrir páskana.

Ásta var svo sæt að leyfa okkur að birta lýsinguna hér á Bleikt:

Ég á ekki mikið af páskaskrauti og er ekkert sérlega mikið fyrir að skreyta heimilið mitt en þegar ég sá marmarapáskaeggjaskraut á pinterest mátti ég til með að prufa! Passlega ekki skærgult og loðið, en samt mjög fallegt og mér finnast þau bara býsna páskaleg.

Það var ótrúlega auðvelt að föndra þetta og tók ekki langa stund!

Það sem til þarf er:

Egg (ég notaði harðsoðin, það má líka blása úr ósoðnum)
Einnota hanskar
Pinni
Korkur og títuprjónar eða bökunarplata
Naglalakk/-lökk
Skál (helst plast sem má henda, þarf að vera það djúp að eggið komist á kaf)

Skref 1:
Setja volgt vatn (mikilvægt að það sé ekki kalt) í skál

Skref 2:
Láta naglalakk dropa ofan í vatnið, ég hristi það meira og fannst áferðin mjög skemmtileg af því..það kom meira lakk og liturinn varð dekkri á eggjunum.
Á þremur eggjum setti ég fyrst glimmerlakk og gerði svo aðra umferð með lit, mér fannst það koma vel út 🙂

Skref 3:
Um leið og lakkið er komið út í er gott að hræra lauslega í með priki til að mynda marmaraáferðina, og svo er egginu dýft á bólakaf ofan í vatnið. Þetta þarf að gerast frekar hratt og til að hylja allt eggið þarf að snúa því snöggt við.

Skref 4:
Eggið er tekið upp úr og leyft að þorna á bökunargrind eða 4 títuprjónum stungið í kork og lagt ofan á prjónana.

Ótrúlega einfalt föndur sem allir ættu að geta framkvæmt!

Góða helgi 🙂