Andrea Eir veiktist fyrr í mánuðinum og fékk hún vírus í hjartað og bráða hjartabólgu. Miðvikudaginn 11. október var hún flutt með sjúkraflugi á Karólinska sjúkrahúsið í Svíþjóð. Andrea Eir lést 15.október síðastliðinn aðeins fimm ára gömul.
Mikill kostnaður skapast við þessar aðstæður og hafa vinir og aðstandendur fjölskyldunnar því ákveðið að halda tónleika með landsfrægu tónlistarfólki
þetta kvöld þeim til styrktar.
Kynnir er Theodór Francis Birgisson
Fram koma:
Páll Óskar og Monika
Regína Ósk
Magnús Kjartan
Ylja
Helgi Björnsson
Guðrún Árný
Karitas Harpa
Gunnar Ólason
Hreimur og Made in sveitin
Tónleikarnir verða í Selfosskirkju mánudagskvöldið 6. nóvember næstkomandi kl. 19.30 og er miðaverð 3.500 kr. Frítt fyrir börn 5 ára og yngri.
Miðasala byrjar miðvikudaginn 1. nóvember næstkomandi og verður í Dýraríkinu á Selfossi og í Reykjavík, Verzluninni Borg í Grímsnesi og Skálanum Stokkseyri.
Þeim sem ekki komast á tónleikana en vilja leggja fjölskyldunni lið er bent á styrktarreikning sem er á nafni Guðrúnar Jónu Borgarsdóttur, móðir Andreu:
Reikningur: 0586-26-850105 – Kennitala: 041177-3499.
Kristján Hreinsson skáld samdi ljóð í minningu hennar og Hjalta Jakobs Ingasonar, sem lést í bruna á Stokkseyri þann 1. júlí 2016.
TVÆR SÁLIR
Um nótt á meðan vetrarvindur hlær
þá virðist þessi heimur laus við gleði
í sáran huga koma kistur tvær
sem kyrrðin geymir nú í moldarbeði.
Þar hurfu sálir tvær úr bjartri byggð
sem burt þær kaldur vindur hefði hrakið
en hérna sálir þessar þráðu tryggð
og þráin hafði ýmsar spurnir vakið.
Þær sálir gátu ekki veitt sér vörn
og vissu afar fátt um óttans gildi
þau voru hérna bara lítil börn,
sem báðu einungis um ást og mildi.
Við finnum hvorki svör né sanngjörn ráð
er sorgmædd hjörtun heyra vindinn gnauða
því þegar í þau mál með spekt er spáð
þá spyrjum við um tilgang lífs og dauða.
Að morgni skreytir birta skýjaborg
og bitur vindur virðist undan láta
en þar sem börnin léku, situr sorg
og söknuður sem latur hjörtun gráta.
