Kendall og Kylie Jenner hafa verið harðlega gagnrýndar enn og aftur fyrir fatalínuna sína Kendall+Kylie. Þær eru ásakaðar um menningarnám (e. cultural appropriation) og er gagnrýnin vegna myndar á Instagram síðu Kendall+Kylie. Á myndinni er fyrirsæta klædd í köflótta skyrtu, aðeins hneppt efst, gegnsæjum topp undir, víðum buxum og með stóra gyllta eyrnalokka.
Neikvæðum ummælum fjölgaði hratt og var myndinni eytt af síðunni í kjölfarið. Það var þó ekki fyrr en slúðursíðan The Shade Room náði skjáskoti af myndinni og deildi á Instagram.
Netverjar eru ekki reiðir yfir köflóttu skyrtunni heldur hvernig fötin eru stíliseruð saman. Sumum fannst þetta vera innblásið af Chola menningu.
„Nú eru þær að reyna að vera Cholas. Ætla þær einhvern tíman að hætta menningarnámi,“
skrifaði einn Instagram notandi. „Óvirðingavert“ skrifaði annar.
Hugtakið Chola var upphaflega notað af evrópskum landnemum sem niðrandi orð til að lýsa fólki frá Suður- og Mið-Ameríku. Mexíkóskt-amerískt fólk endurheimti hugtakið til baka á sjöunda áratugnum. Chola stíllinn er algengur hjá suðuramerískum konum. Það sem einkennir stílinn er meðal annars dökkmálaðar varir með sterkum útlínum, þykkur augnblýantur, köflótt flannel skyrta og hálsklútur (e. bandana).
Þetta er ekki í fyrsta skipti sem systurnar eru ásakaðar um menningarnám. Í júní voru þær gagnrýndar fyrir að setja mynd af andlitunum sínum á „vintage“ boli með tónlistargoðsögnum eins og Notorious B.I.G., Tupac, Pink Floyd og Ozzy Osbourne. Bolirnir vöktu hörð viðbrögð og fordæmdu margir systurnar fyrir að setja andlitin sín yfir þekktu tónlistargoðin.
„Ég er ekki viss hver sagði Kylie Jenner og Kendall Jenner að þær mættu gera þetta. Óvirðingin að tala ekki einu sinni við mig eða einhvern tengdan búinu gerir mig ráðþrota. Ég hef ekki hugmynd af hverju þeim finnst í lagi að hagnast á dauða 2pac og sonar míns Christopher. Þetta er óvirðing og ógeðslegt!“
Skrifaði Voletta, móðir Biggie, í færslu á Instagram.
Bolirnir voru teknir úr sölu og báðust systurnar báðar afsökunar á samfélagsmiðlum. Systurnar hafa hins vegar hvorugar tjáð opinberlega sig um Instagram myndina en hafa þó eytt henni út af öllum samfélagsmiðlu.
