Jökull og félagar í hljómsveitinni Kaleo eru á fleygiferð á tónleikaferðalagi um Bandaríkin um þessar mundir. Þeir koma til með að troða upp víða um Evrópu þegar líður á júní mánuð en vinsældir sveitarinnar fara sífellt vaxandi um allan heim. Mörg af lögum þeirra hafa ratað á alþjóðlega vinsældarlista, en lagið Way Down We Go náði efsta sæti á lista Billboard yfir „alternative“ lög.
Það eru þó nokkur lög sem drengirnir hafa fengið sig fullsadda af því að spila – en þau eru ekki úr þeirra eigin smiðju. Um er að ræða þekka slagara sem eru sérstaklega vinsæl trúbadoralög. Þeir hafa því lagt blátt bann við lögunum eins og Mustang Sally, Smoke on the Water, Stairway to Heaven og Free Bird. Hóta þeir sekt og brottvísun ef einhver í tónleikarútunni þeirra óskar eftir þessum lögum eða spilar þau.
Líklega er þetta allt til gamans gert – en hver þorir að taka áhættuna? „Ný rúta, nýjar reglur,“ segja piltarnir á Instagram.
https://www.instagram.com/p/BVDkN0ODsyX/?taken-by=officialkaleo
