Allir vilja góða líðan og gott líf. Forsendur okkar eru misjafnar, en öll getum við gert eitt og annað til að bæta líðan okkar. Hér eru nokkur ráð sem hafa gagnast mér og fleirum vel í baráttunni:
Þakklæti er tilfinning sem getur ekki annað en leitt gott af sér. Þakklæti er heimatilbúið, eina hráefnið sem þarf eru hugsanir – og það kostar ekki neitt. Þakklæti getur verið óskaplega einfalt – ef þér dettur ekki neitt í hug að þakka fyrir skaltu bara líta í kringum þig. Kannski áttu þægilegan stól sem þú hvílist í daglega, hlýja sokka sem gera kvöldin notaleg, eða vekjaraklukku sem vekur þig með dásamlegri sólarupprás. Það má alveg þakka fyrir hluti. Við getum líka þakkað fyrir flóknari hluti – jafnvel erfiðleika. Ef til vill ertu óendanlega þakklát/ur fyrir að hafa nýlega komist að framhjáhaldi maka þíns, en ekki eftir 5 ár af lygi í viðbót! Prófaðu, og haltu jafnvel þakklætisdagbók.
Stundum er gott að muna hversu ofboðslega lítill maður er í stóra samhenginu. Á jörðinni okkar búa um 7 milljarðar af manneskjum, sem allar eru að reyna að komast af. Prófaðu að skoða samhengi hlutanna á þessum ágæta vef – og spáðu svo í hversu lítilvæg þín vandamál eru í samhengi við allt annað.
Temdu þér milda afstöðu til þeirra sem verða á vegi þínum. Það sem við gefum öðrum hefur nefnilega tilhneigingu til að skoppa til baka beint í hausinn á okkur. Árás er svarað með árás, öskri er svarað með öskri, og brosi er yfirleitt svarað með brosi. Við getum aldrei vitað með vissu hvað sá sem við hittum er búinn að ganga í gegnum. Kannski dó kötturinn hans í gær, og kannski steig hann á teiknibólu þegar hann fór framúr í morgun.
Drekktu mikið af því. Það bætir heilsu, útlit og svefn.
Leyfðu þér að njóta nándar með fólki sem stendur þér nærri. Hér eru gæði ofar magni. Nánd getur falist í þvi að hnoðast með börnunum, elda með makanum og spjalla á meðan, fara í ísbíltúr með besta vininum, eða sitja í þögn og prjóna með góðri vinkonu.
Lífið verður svo miklu skemmtilegra ef þú segir já. Þú gætir uppgötvað eitthvað nýtt og lent í alls konar ævintýrum. Ef þig dreymir um að hlaupast á brott með sirkusnum er ekki vænlegt til árangurs að setjast á stól fyrir utan húsið þitt og bíða. Reimaðu frekar á þig skóna og leitaðu sirkusinn uppi!
Notaðu hann. Það er eina leiðin til að halda honum í lagi á meðan jarðvistarinnar nýtur.
Leyfðu þér að finna til frekar en að bægja burtu öllum tilfinningum sem þú hefur lært að séu neikvæðar. Það er ekkert að því að hrasa af og til ofan í smá dældir á veginum – galdurinn er að kunna leiðina upp úr holunni aftur. Biddu um hjálp þegar þú þarft hana.
