Verðlaunin eru veitt á stærstu glæpasagnaverðlaunahátíð í Evrópu, The International Mystery & Thriller Festival, sem haldin er ár hvert í Worclaw, Póllandi.
Hátíðin hefur verið haldin síðan árið 2004 og er gríðarlega vel sótt af heimamönnum, bæði almennum lesendum og fjölmiðlafólki. Einn af aðalviðburðum hátíðarinnar ár hvert er verðlaunaafhending Kalíber verðlaunanna, The Great Calibre Award, þar sem einn pólskur höfundur er verðlaunaður ásamt einum erlendum höfundi.
Í ár er það Arnaldur Indriðason sem hneppti hnossið og tók við verðlaununum úr hendi Boris Akunin, hins virta rússneska glæpasagnahöfundar. Þessi heiðursverðlaun eru ekki afhent fyrir staka bók heldur fyrir verk höfundar í heild sinni og er ljóst að Arnaldur er gríðarlega vel að verðlaununum kominn.
Það er W.A.B. útgáfan sem gefur verk Arnalds Indriðasonar út í Póllandi, í gegnum réttindaskrifstofu Forlagsins. Pólverjar hafa heillast algjörlega af verkum Arnalds, en alls hafa yfir 100.000 eintök af bókum hans selst þar í landi.
