Fyrsta þáttaröðin af Fallinu var bæði vel gerð og æsispennandi. Önnur þáttaröð náði ekki sömu gæðum en var samt gott sjónvarpsefni. RÚV hefur nýlokið við að sýna þriðju þáttaröðina sem var algjörlega óþörf viðbót. Áhorf á hana var ekkert annað en tímaeyðsla. Í hverjum þætti beið maður eftir því að eitthvað gerðist en svo að segja ekkert bar til tíðinda, annað en að okkur var ætlað að kynnast sálarlífi morðingjans betur en áður. Ekki tókst þó að glæða áhuga manns. Í lokaþættinum var reynt að bæta tíðindaleysið upp með nokkrum ofbeldisatriðum sem áttu sennilega að skelfa mann en voru svo ýkt að maður yppti bara öxlum. Hið sama má segja um lokaatriðið sem sneri að örlögum morðingjans, það lá við að vera fáránlegt, þar var mikill hamagangur sem snerti mann lítt.

Ákveðið kraftleysi einkenndi þessa síðustu þáttaröð. Manni fannst stundum eins og handritshöfundurinn hefði farið í frí og leikararnir væru að reyna að spinna þráð úr engu. Hin fína leikkona Gillian Anderson, í hlutverki lögreglukonunnar, hafði lítið að gera annað en að vera afar áhyggjufull og hvísla. Jamie Dornan í hlutverki morðingjans var allan tímann úti á þekju.

Ég hef sjaldan eða kannski aldrei horft á jafn svæfandi spennuþátt. En nú er Fallinu lokið. Vonandi verður ekki framhald á, það er komið nóg. Annar þáttur sem hefur greinilega einnig runnið sitt skeið á enda er The Affair sem sýndur hefur verið í Sjónvarpi Símans. Fyrsta þáttaröðin var afar góð en sú þriðja drepleiðinleg og tilgerðarleg. Stundum er best að hætta leik þá hæst hann stendur en ekki fara í þreytandi útþynningu, eins og raunin hefur orðið með þessa tvo framhaldsþætti.