Yrsa Sigurðardóttir verður meðal höfunda á bresku Cheltenham-bókmenntahátíðinni sem haldin er 7.–16. október. Hátíðin hefur verið haldin árlega frá 1949. Meðal þátttakenda eru Ian McEwan, Sebastian Faulks, Mark Haddon, Lionel Shriver, Edna O’Brien, Tracy Chevalier og eru þá fáeinir nefndir.

Norski rithöfundurinn Karl Ove Knausgaard fær á hátíðinni bókmenntaverðlaun Sunday Times en hann er höfundur rómaðra bóka þar sem hann byggir á ævi sinni. Bókmenntaverðlaun Sunday Times hafa verið veitt frá árinu 1987 og meðal verðlaunahafa liðinna ára eru Anthony Burgess, Ted Hughes, Seamus Heaney, Anne Tyler, John Le Carré, Muriel Spark, Harold Pinter, Margaret Atwood, Julian Barnes og Kazuo Ishiguro.

Yrsa sagði í samtali við DV að þátttaka á hátíðum eins og þessari væri orðin stór hluti af starfi sínu. „Yfirleitt sæki ég mest glæpasagnahátíðir en síðan koma blandaðir hátíðir eins og þessar þar sem eru stór nöfn úr fagurbókmenntageiranum. Ég hlakka til að mæta,“ segir Yrsa. Verkefni sumarsins hjá Yrsu er glæpasaga sem kemur úr fyrir jólin og þar eru Huldar og Freyja aðalpersónur en lesendur þekkja þau úr DNA og Soginu.