Tónleikarnir „Hljómlist án landamæra“ voru haldnir sumardaginn fyrsta í Hljómahöllinni í Reykjanesbæ. Þetta er annað árið í röð sem tónleikarnir eru haldnir, en þeir eru hluti af listahátíðinni „List án landamæra“ sem haldin var í fyrsta sinn á Evrópuári fatlaðra árið 2003. Kjartan Már Kjartansson, fiðluleikari og bæjarstjóri Reykjanesbæjar, setti tónleikana með fiðluleik og hópdansi tónleikagesta.

„Þetta tókst mjög vel, frábærir tónleikar og salur fullur af fólki,“ segir Kjartan Már. „Menn skemmtu sér konunglega, en þetta er í annað sinn sem við Suðurnesjamenn bjóðum upp á þessa tónleika.“

TÓNLIST Í HÁLFA ÖLD Már Gunnarsson, tónlistarmaður og tónskáld, hefur þrátt fyrir ungan aldur sýnt að hann á frama fyrir sér á tónlistarbrautinni. Kjartan Már á hins vegar um hálfa öld að baki í fiðluleiknum.

Á tónleikunum komu fram fatlaðir og ófatlaðir tónlistarmenn og skemmtu sér og öðrum enda er tónlistin án allra landamæra. Tónlistarmennirnir komu frá Akranesi, Selfossi og Suðurnesjum og á meðal þeirra sem komu fram var Baggabandið, Már Gunnarsson og söngkonurnar Karitas Harpa og Salka Sól. Tónleikarnir eru samstarfsverkefni sveitarfélaganna á Suðurnesjum, Miðstöðvar símenntunar á Suðurnesjum og Listar án landamæra en er styrkt af Uppbyggingarsjóði Suðurnesja. Nánari upplýsingar er að finna á facebooksíðu verkefnisins

Skilgreinir sig sem fiðluleikara

Bæjarstjórinn, sem titlar sig sem slíkan og fiðluleikara, á ja.is setti tónleikana, þar sem hann spilaði á fiðlu og kenndi dans. „Ég fékk fólk til að hreyfa sig í upphafi áður en það settist næstu tvær klukkustundir,“ segir Kjartan Már. „Við dönsuðum einn dans sem heitir Nornadansinn og ég kenndi þeim danshreyfingarnar,“ segir hann. Kjartan Már var um fimm ára gamall þegar hann hóf að læra á fiðlu. Hann var fiðlukennari í 18 ár og tónlistarstjóri í 13 ár í Tónlistarskóla Reykjanesbæjar. En tekur Kjartan Már fiðluna oft upp opinberlega? „Ég hef ekki gert mikið af því, en ég spila svolítið suður frá við ýmis tækifæri, aðallega í jarðarförum,“ segir Kjartan Már sem heldur spilamennskunni alltaf við.

KOSTULEGIR KYNNAR Leikararnir Guðjón Davíð Karlsson og Hallgrímur Ólafsson voru kynnar tónleikanna og rúlluðu því upp eins og þeir eru vanir.

FLOTTUR FAÐIR Gunnar Már Másson faðir Más, tónlistarmannsins unga, var mættur að hlýða á tónleikana ásamt Rut Sumarrós.

TVÆR HÆFILEIKARÍKAR Söngkonan Salka Sól og Freyja voru spenntar í upphafi tónleikanna. Sölku Sól er allt til lista lagt í tónlistinni og ljósmyndir frá Freyju hafa birst í Séð og Heyrt auk þess sem hún er lunkin á skautum.

HUGSAR VEL UM GESTINA Kristín Ósk Wium Hjartardóttir er einn af starfsmönnum Hljómahallar þar sem fram fara fjölmargir viðburðir við allra hæfi.

ÞJÁLFARINN OG NEMANDINN Vel fór á með söngkonunum Karitas Hörpu Davíðsdóttur, sigurvegara í The Voice Ísland nú í ár, og Sölku Sól, sem var þjálfari hennar í The Voice.

FIMM FRÆKIN Eva Dögg Héðinsdóttir, Freyr Karlsson, Heiðrún Hermannsdóttir, Jón Agnarsson og Stefán Trausti Rafnsson slógu á létta strengi með Baggabandinu frá Akranesi.

SMELLT Í „SELFIE“ Guðjón Davíð kynnir virðist hér vera að undirbúa „selfie“ myndatöku með aðdáanda.

DANSINN DUNAR Stelpurnar eru allar að læra dans hjá Danskompaníinu í Reykjanesbæ.