Hálfsystir Meghan Markle, Samantha, vinnur að bók um systur sína. Meghan mun eins og alþjóð er kunnugt ganga í hjónaband með Harry Bretaprinsi á næsta ári. Samantha, sem er 53 ára og býr í Flórída, tjáði sig um samband Meghan og Harrys í viðtali við US Weekley skömmu eftir að fréttir um samdrátt þeirra tóku að birtast. Þar fór hún hörðum orðum um systur sína sem hún sagði vera sjálfselska og sjálfsupptekna. Hún sagði að Harry myndi blöskra ef hann vissi um framkomu Meghan við fjölskyldu sína. „Sannleikurinn um hana myndi ganga frá sambandi hennar við Harry, hann myndi ekki kæra sig um að vera með henni lengur,“ var haft eftir Samönthu. Nokkrum dögum síðar sagði Samantha að blaðamaður hefur haft rangt eftir henni og fór í fleiri viðtöl þar sem hún bar mikið lof á hálfsystur sína.

Meghan á tvö hálfsystkini, Samönthu og Thomas. Thomas hefur aldrei sagt styggðaryrði um Meghan og sagði nýlega við fjölmiðla að hún hefði alltaf verið prinsessa og að hann hefði alltaf verið afar stoltur af henni. „Það blasti alltaf við að eitthvað mikið myndi verða úr henni,“ sagði hann.

Samantha vinnur, sem fyrr segir, nú að bók um Meghan hálfsystur sína sem hún hefur ekki séð síðan við útskriftarathöfn árið 2008. Aðrir fjölskyldumeðlimir eru lítt hrifnir af þessu tiltæki og segja líklegt að bókin verði samansafn af lygum og gróusögum.