„Ég hef enga hugmynd um hvað ég er að syngja.“ Þetta segir trúbadorinn Eiríkur Hafdal sem lærði nýverið að syngja lagið Despacito. Lagið, í flutningi Luis Fonsi og Justins Bieber, er það allra vinsælasta í heiminum um þessar mundir. Ísland er þar engin undantekning, en Despacito hefur trónað á toppi vinsældalista íslensku útvarpsstöðvanna sem og Iceland top 50 á Spotify undanfarnar vikur. Eiríkur mætti á K100 og tók lagið og hefur upptakan slegið í gegn á Facebook.

Fáir geta þó státað sig af því að geta sungið lagið, sem er að megninu til á spænsku.

„Í byrjun júní áttaði ég mig á því að ég þyrfti að læra Despacito ef ég ætlaði að þrauka sumarið. Allir voru og eru enn að biðja um þetta,“ segir Eiríkur. Eftir að hafa hlusta á lagið í heila viku á „repeat“ var hann búinn að læra viðlagið og fyrstu sex línurnar í laginu utan að.

„Þetta er allt að koma,“ segir Eiríkur sem leggur mikið upp úr því að læra öll þau óskalög sem hann er beðinn um þegar hann er að spila. „Það er gaman að taka óhefðbundin lög.“

Inntur svara um hvaða lag honum þyki leiðinlegast að spila svarar hann hratt og örugglega: „Það er Wonderwall með Oasis. Ég fæ grænar bólur þegar ég svo mikið sem hugsa um það.“