Leikaranum Jóhannesi Hauki Jóhannessyni var legið á hálsi fyrir að hafa, mögulega, gefið upp of miklar upplýsingar um frammistöðu sína í Game of Thrones-þáttunum í síðustu viku, þegar hann benti á það á Twitter að karakter hans yrði í þættinum sem sýndur var vestanhafs í gærkvöldi. Jóhannes lét það sér í léttu rúmi liggja, en fylgdist svo sjálfur með þættinum í nótt og tísti. „Klukkan er næstum eitt og ég er fjári þreyttur. En ég verð að halda mér vakandi, ég stenst ekki mátið að sjá sjálfan mig á skjánum,“ sagði hann og blótaði sjálfselsku sinni léttur.

Af ótta við að eyðileggja fyrir hörðum aðdáendum Game of Thrones verður viðbrögðum Jóhannesar og tísti ekki lýst frekar, enda jaðrar það við föðurlandssvik að skúbba því sem gerist í þáttunum.