„Ég var lengi að hugsa um hvað væri hægt að gera til að safna fyrir lyftaranum og ákvað svo að gera þetta,“ segir Skagamaðurinn Ragnar Egilsson, sem er í hjólastól og safnar sér nú fyrir ferðalyftara með því að selja buff á Facebook-síðunni Brask og brall.

Ragnar er 33 ára gamall og lamaður fyrir neðan háls eftir bifhjólaslys í júní 2014. Buffin sem hann selur nú á Facebook eru með myndum af hauskúpum, Hvolpasveitinni og Hello Kitty. Viðbrögðin við Facebook-auglýsingunni eru framar hans björtustu vonum en innan við sólarhring eftir að hún birtist höfðu yfir 50 manns pantað buff.

„Þetta gengur þokkalega vel, það vantar ekki,“ segir Ragnar.

„Ef ég fer eitthvað úr húsi þarf ég að hafa ferðalyftara til að færa mig í og úr stólnum. Ég er með annan búnað heima hjá mér en þetta er svo maður geti leyft sér eitt og annað eins og að bregða sér út úr húsi. Ef ég ætla að fara á hótel einhvers staðar úti á landi þarf ég að eiga svona lyftara,“ segir Ragnar.