Erlendur einstaklingur varpar fram, á samfélagsmiðlinum Reddit, þeirri staðhæfingu að það sé ekki þess virði að ferðast til Íslands að vetri til. Segist einstaklingurinn ekki ætla sér að móðga neinn með þessu. Fullyrðingar hans fá misjafnar undirtektir en flestir sem svara honum árétta þó að hann hafi fullan rétt á að hafa slíka skoðun.

Umræddur einstaklingur segir í innleggi sínu að Ísland sé ekki þess virði, á veturna. Veðrið sé hræðilegt:

„Þú ferðast alla þessa leið og eyðir svo miklum peningum til þess að sjá örfáa fallega fossa og strendur.“

Viðkomandi bætir síðan við að þetta allt sé hægt að sjá í Svíþjóð, Noregi og Finnlandi:

„Mér finnst náttúran þar vera fallegri og fjölbreytilegri.“

Einstaklingurinn fullyrðir að hann hafi rætt við Íslending sem hafi sagst velta því fyrir sér hvað ferðamönnum þætti eiginlega svona merkilegt við íslenska fossa:

„Rigning, vindur, snjór, óveður, hræðilegt veður almennt og stundum eru fossarnir jafnvel frosnir, þannig að þeir eru bara þarna.“

Viðkomandi bætir við að ef fólk komi til Íslands um vetur til að sjá Norðurljós þá sé afar líklegt að það verði fyrir vonbrigðum.

Höfundur innleggsins tekur þó sérstaklega fram að hann hafi aldrei komið til Íslands að sumri til og telji að þá sé ástandið töluvert öðruvísi.

Fegurð vetrarins

Í svörum við innlegginu kemur almennt fram að viðkomandi hafi fullan rétt á að hafa þessa skoðun. Sumir segjast telja að íslenski veturinn búi yfir ákveðinni fegurð. Einn aðili sem segist á þeirri skoðun segir þó að vissulega geti verið vandasamt að ferðast um Ísland á veturna en hins vegar sé þá hægt að finna ódýrari gistingu en á sumrin.

Einn aðili segist hins vegar vera á öndverðri skoðun en höfundur innleggsins. Veðrið og landslagið á Íslandi sé svo ólíkt öðrum löndum sem hægt sé að ferðast til en þá sé gott að vera hrifinn af eldfjöllum. snjó og dramatísku útsýni. Þess vegna sé viðkomandi hrifinn af Íslandi, hafi komið þangað og ætli sér að koma aftur í janúar næstkomandi.

Aðrir andmælendur telja að mögulega hafi höfundur innleggsins ekki skipulagt vetrarferð sína til Íslands nógu vel. Það eigi ekki koma á óvart að veðrið geti verið vont á veturna og það eigi við um fleiri lönd en Ísland.

Einn einstaklingur skýrir hins vegar frá því með gráttjákni að hann hafi séð innleggið nokkrum klukkutímum eftir að hafa bókað flug til Íslands og virðist því nú sjá eftir öllu saman.