Hátíðin hófst með sundlaugarpartýi í sundlaug Seltjarnarness þar sem boðið var upp á laktósalausan ís og lifandi tónlist. Bæjarbúar skreyttu hús og lóðir samkvæmt litaþema, boðið var upp á hjólreiðatúr um nesið undir leiðsögn og svo var haldin hamborgaragrillveisla við Valhúsaskóla.

Hápunkturinn í þessari vel heppnuðu dagskrá var svo Brekkusöngurinn í Plútóbrekku þar sem fólk á öllum aldri mætti til að lyfta sér upp. Leikarinn og Seltirningurinn Jóhann G. Jóhannsson hélt uppi rífandi stemmningu með valinkunnu liði listamanna. Meðal annara stigu á stokk strákarnir í hljómsveitnni Tapír og bræðurnir Frikki Dór og Jón Jónsson stýrðu mjög vel heppnuðum fjöldasöng.

Stemningin í brekkunni var stórkostleg að sögn viðstaddra en talið er að um 700 manns hafi mætt á svæðið. Bæjarins beztu buðu upp á pylsur og Veislan bauð upp á rjúkandi heita íslenska kjötsúpu í brekkunni. Allt ákaflega þjóðlegt.
Framtakinu var vel tekið af bæjarbúum og fólk á einu máli um að bæjarhátíð Seltjarnarness væri sannarlega komin til að vera.

Götugrill Íbúar úr öllum hverfum bæjarins sameinuðust um grillveislu sem haldin var við Valhúsaskóla.

Gleðipinnar Sjöfn Þórðardóttir, Frikki Dór og Jón Jónsson

Gleði í Plútóbrekku Mikill fjöldi fólks á öllum aldri kom saman í Plútóbrekku.

Kjötsúpukarlarnir Veislan bauð bæjarbúum upp á heita, hressandi kjötsúpu.

Laktósalaust Boðið var upp á ís í sundlauginni og féll það vel í kramið hjá þeim yngstu.