Leikkonan Justine Bateman er enginn aðdáandi hertogahjónanna, Harry Bretaprins og Meghan Markle. Hún segir þau atvinnufólk í að gera sig sjálf að fórnarlömbum. Hún segir Bandaríkjamenn dauðþreytta á hjónunum og vælinu í þeim.
„Vandamálið með Meghan Markle (og eiginmann hennar Harry) er að hvert tækifæri sem þau hafa gripið eða misnotað undanfarin ár má rekja til þess að þau eru í frekar aggressívri markaðsherferð fyrir Ólympíuleika fórnarlamba,“ skrifar leikkonan í fréttabréfi sínu, RACE TRACK Substack. „Munurinn á því að stunda þetta fyrir tveimur árum annars vegar og svo hins vegar núna er gífurlegur. Það er árið 2025 og enginn nennir fórnarlömbum lengur. Enginn vill horfa á fólk í þykjustuleik sem þau hafa ekki unnið sér inn fyrir.“
Leikkonan vísaði þarna til nýrra lífsstílsþátta hertogaynjunnar sem hafa ekki gengið eins vel og vonast var til. Justine segir að enginn sé að vinna gegn Markle. Hertogaynjan hafi fullan rétt á að halda úti matreiðsluþætti eða hlaðvarpi. Hins vegar hafi almenningur rétt á því að velja hvað þeir horfa eða hlusta á.
Bateman hefur áður úthúðað hertogahjónunum. Nýlega þegar miklir eldar loguðu í Hollywood sakaði Bateman hertogahjónin um að vera hamfaratúrista. Þau hafi mætt á svæði eldanna, þóst vera að hjálpa en fyrst og fremst verið að auglýsa hvað þau séu nú góð og frábær. Þau væru því engu skárri en ljósmyndarar sem elta sjúkrabíla í von um söluvænar myndir.
Lífsstílsþættirnir, With Love, Meghan, hafa verið harðlega gagnrýndir. Meðal annars er Markle sökuð um að hafa notað tækifærið til að koma með ódýr skot á bresku konungsfjölskylduna. Hertogaynjan er sökuð um að vera orðin bitur. Hún sé sífellt að ráðast á tengdafjölskyldu sína í von um viðbrögð frá þeim eða í von um vinsældir. Í einum þættinum er Markle að spjalla við grínleikonuna Mindy Kaling og skammar hana fyrir að ávarpa sig ekki með réttum titli.
„Það er líka fyndið að þú sért alltaf að segja „Meghan Markle“. Þú veist að ég er Sussex-hertogaynja núna?“
Bresku götublöðin virðast mörg sannfærð um að hertogahjónin séu við það að skilja. Orðið á götunni er að Netflix sé ekki búið að segja upp samningi sínum við hertogahjónin einmitt út af væntanlegum skilnaði. Netflix viti að áhuginn á hjónunum er lítill í dag en muni aukast mikið við skilnað og auk þess skapist þá möguleikinn á nýjum heimildarþáttum sem geti vakið mikla athygli.
