Frægasti köttur Akureyrar, Reykjavík, er á húsnæðishrakhólum frá þessu er greint á Akureyri.net. Kötturinn vann sér það til frægðar að skipta efsta sæti á lista Kattaframboðsins á Akureyri fyrir síðustu sveitastjórnarkosningar en til þess að uppfylla reglur kjörstjórnar var það listamaðurinn Snorri Ásmundsson sem skipaði sætið fyrir hönd kattarins. Markmið framboðsins var að stemma stigu við áætlunum um bann við lausagöngu katta á Akureyri eins og frægt varð.
Ástæðan fyrir vandræðum Reykjavíkur er sú að eigandi hans, Guðrún Þórsdóttir, er að flytjast búferlum til höfuðborgarinnar.
„Ég er að flytja í höfuðborgina og ég held bara að hún Reykjavík myndi ekki kunna við sig í borginni, hún er svo mikill Akureyringur og því langar mig til þess að athuga hvort það sé kannski fólk hér í bænum sem er til í að taka við henni. En ef í harðbakkann slær þá kemur hún suður í Vesturbæinn með mér,“ segir Guðrún í samtali við norðlenska miðilinn.
Reykjavík er sögð sérstaklega kelin og félagslynd en að sögn eigandans hefur borið á því að hún hafi ofmetnast í kjölfar kosninganna. „Hún var náttúrulega bæjarstjóraefni,“ segir Guðrún.
