Steinunn Jónsdóttir, tónlistarkona og meðlimur í vinsælu rappsveitinni Reykjavíkurdætur, segir að það sé úrelt hugsun að það séu ekki nógu margar vinsælar tónlistarkonur til að kynjahlutföll séu jöfn á viðburðum.

Hún vakti fyrst athygli á þessu á Instagram um helgina og benti á að konur séu í meirihluta á topplista Bylgjunnar.

„Kæru viðburðahaldarar. „Afsökunin „það eru ekki nógu margir vinsælir [kvenkyns] flytjendur og þess vegna eru 90 prósent af flytjendum á dagskránni okkar [karlmenn]“ er úrelt. Étið hattinn ykkar. Bókið konur,“ skrifaði hún á Instagram.

Fréttablaðið ræddi við Steinunni sem sagði þetta væri „svo þreytandi gömul tugga.“

„Og í rauninni mjög skaðleg. Það er mikilvægt fyrir stelpur sem eru að vaxa úr grasi og alla krakka að sjá allskonar listafólk af öllum kynjum og að allir fái pláss,“ sagði hún.

Hún og hinar Reykjavíkurdæturnar hafa fengið þau svör, við spurningum um skort á kvenkyns flytjendum á viðburðum, að það séu einfaldlega ekki nógu margar vinsælar tónlistarkonur. „Þetta er ekki rétt í dag,“ sagði hún við Fréttablaðið. Hljómsveitin Reykjavíkurdætur hefur verið í þeirri undarlegu stöðu að eftirspurn eftir þeim hefur verið gríðarleg á tónlistarhátíðum erlendis, löngu áður en þær slógu í gegn hérlendis í undankeppni Eurovision, en sama var ekki uppi á teningnum hjá íslenskum viðburðahöldurum.

Steinunn benti einnig á að tónlistarhátíðin Icelandic Airwaves hafi sett sér upp kynjakvóta og það hafi selst upp á hátíðina í fyrra.

„Það var enginn sem hugsaði, hér eru of margar konur,“ sagði hún.