Bandaríski stórleikarinn Bruce Willis berst nú við sjaldgæfa framheilabilun sem veldur miklum persónuleikabreytingum. Hann greindist með sjúkdóminn í ársbyrjun þó einkennin hafi verið farin að gera vart við sig snemma á síðasta ári.

Heimildarmenn US Weekly tímaritsins segja að heilsu leikarans hraki hratt.

„Bruce á góða daga og hann á slæma daga, en síðustu tvo mánuði hafa slæmu dagarnir verið mun fleiri en þeir góðu,“ segir heimildarmaður blaðsins.

Fjölskylda leikarans hefur staðið þétt við bak hans í veikindunum og hafa núverandi eiginkona hans, Emma Heming, og fyrrverandi eiginkona hans, Demi Moore, snúið bökum saman. Þá hafa börn leikarans hugsað vel um föður sinn.

„Veikindin hafa gert fjölskylduna enn samheldnari. Það veit enginn hvað Bruce á mikinn tíma eftir þannig að það eru allir að reyna að njóta hverrar einustu stundar með honum,“ segir heimildarmaður US Weekly.