Erla er nýjasti gestur í Fókus, spjallþætti DV í umsjón Guðrúnar Óskar Guðjónsdóttur. Hún er sálfræðingur og doktor í líf- og læknavísindum, stofnandi og framkvæmdastjóri Betri Svefns og hefur um árabil sérhæft sig í rannsóknum á svefni og meðferðum gegn svefnleysi.
Aðspurð hvort það sé æskilegt að „snúsa“ á morgnanna svarar Erla neitandi.
„Þetta er svo mikil sóun á samfelldum svefni sem þú gætir verið að fá. Þetta er stöðug truflun á svefninum þínum,“ segir hún.
Að „snúsa“ er þegar vekjaraklukkan hringir en viðkomandi ýtir á snús-takkann og vekjaraklukkan hringir þá aftur eftir fimm til tíu mínútur. Á iPhone símum er snúsið yfirleitt níu mínútur.
„Þú ert að rugla svefnkerfið þitt og ert ekki að fá neinn gæðasvefn, engan djúpsvefn. Það væri miklu betra fyrir þig að sofa klukkutíma lengur en að snúsa í klukkutíma,“ segir hún og bætir við að það sé í góðu lagi að snúsa ef þú ert bara að kúra aðeins og koma þér í gang, en það sé slæmt að festa svefn aftur.
„Undir morgun er léttur svefn, draumsvefn ríkjandi. Fyrri hluta nætur er það djúpsvefn, þannig venjulega þegar vekjaraklukkan hringir í fyrsta sinn á morgnanna erum við í léttum svefni, það er auðvelt fyrir okkur að vakna. Hins vegar ef við sofnum aftur erum við að byrja nýjan svefnhring og getum verið fljót að komast inn í djúpsvefn, þannig næst þegar klukkan hringir þá erum við kannski í djúpsvefni og að vakna upp úr djúpsvefni er mjög erfitt. Við erum þreytt, illa áttuð og lengi að koma okkur í gang, getum þess vegna verið bara á svona óþægilegum takti allan daginn.“
Í þættinum fer Erla um víðan völl, hún ræðir meðal annars um svefnheilsu, svefnlyfjanotkun Íslendinga, skjánotkun, hvort hægt sé að vinna upp svefn og hvaða áhrif nikótínpúðar hafa á svefninn. Horfðu á þáttinn hér, eða hlustaðu á Spotify.
