Rússneski eldhuginn Evgeny Chebotarev má teljast heppinn að vera á lífi eftir að fífldjarft áhættuatriði hans fór illilega úrskeiðis. Chebotarev freistaði þess að stökkva á bíl milli húsþaka á tveimur yfirgefnum byggingum en til þess notaði hann þó ekki kraftmikinn sportíl, eins og til dæmis Tom Cruise myndi gera, heldur Lödu Niva.
Athæfi Chebotarev var tekið upp á myndband, og tilgangurinn væntanlega að vekja athygli á samfélagsmiðlunum, en það má með sanni segja að aðstoðarmenn ofurhugans hafi fyllst skelfingu þegar stökkið var aðeins of stutt og framrúða rússneska jepplingsins skall á húsinu og þaðan féll bíllinn jarðar, örugglega um tíu metra.
Flestir töldu Chebotarev eflaust af eða þá að hann hefði orðið fyrir alvarlegum meiðslum. Það reyndist þó öðru nær. Ofurhuginn skreið sjálfur út úr bifreiðinni eftir óhappið og hermt er að hann hafi aðeins orðið fyrir minniháttar meiðslum.
