Óskarsverðlaunahafinn Nicolas Cage telst sannarlega meðal stórleikara í heiminum, en engu að síður hefur hann einnig tekið að sér hlutverk í myndum sem hafa vægast sagt fengið slæma dóma. Um tíma virtist raunin vera sú að Cage tæki hreinlega að sér hvert einasta hlutverk sem honum bauðst.
Þá má nefna myndirnar Bangkok Dangerous, Trapped In Paradise, Outcast, Arsenal, og 211, en þær myndir náðu ekki einu sinni 10 prósentunum á Rotten Tomatoes. Við það mætti svo bæta myndunum Grand Isle, Deadfall og Left Behind sem fengu þann vafasama heiður að vera með 0% að mati gagnrýnenda.
Cage hefur þó útskýrt hvers vegna hann tók að sér þessi „hræðilegu“ hlutverk. Það átti sér ósköp eðlilega skýringu. Hann var hreinlega búinn að steypa sér í skuldir og þurfti að taka öllum hlutverkum sem honum buðust.
„Ég hafði fjárfest of mikið í fasteignum. Þetta var ekki út af því að ég eyddi 10 þúsund kalli í kolkrabba. Fasteignamarkaðurinn hrundi og ég náði ekki að koma mér undan í tæka tíð. Ég borgaði þetta allt til baka en þettta voru rúmlega 830 milljónir,“ sagði Cage í viðtali við 60 Minutes.
Hann var þá spurður hvort þetta hafi verið myrkur tími í hans lífi og hann jánkaði því. Honum hafi engu að síður tekist að komast hjá persónulegu gjaldþroti með því að taka að sér fullt að hlutverkum og borga skuldir sínar til baka.
„Það er enginn vafi á því að vinnan hefur alltaf verið minn verndarengill. Þetta voru kannski engar verðlaunamyndir en þetta var samt vinna,“ sagði leikarinn og bætti við: „Jafnvel þó að myndir hafi á endanum verið hryllilega lélegar þá vita þeir að ég er ekki að gefa neitt eftir, og að ég tek hlutverkum mínum að alvöru í hvert sinn“.
Cage tók fram að margir haldi að einu skiptin þar sem hann geti verið góður leikari sé ef hann fái gott hlutverk þar sem hann geti sýnt af sér þau tilþrif sem hann er hvað þekktastur fyrir og hann kallar sjálfur „Cage Rage“ í viðtalinu. Þetta geti þó ekki verið útkoman í hverri mynd hans.
Hann tók þó fram að það séu tiltekin verkefni sem hann virkilega vill taka að sér og hafi tiltekna sýn fyrir.
Þessar aðstæður Cage sem lýst er hér að ofan urðu svo að söguþræði í gamanmyndinni The Unbearable Weight of Massive Talent þar sem Cage lék ýkta útgáfu af sjálfum sér.
Cage tók einnig fram að hann sé mjög stoltur af sínum hlut í myndinni Pig sem kom út árið 2021. Þar lék hann fyrrum kokk ,sem var þó orðinn einsetumaður, sem lenti i því að trufflu-svíni hans var rænt. Kokkurinn fyrrverandi þurfti því að rjúfa einangrun sína til að hafa upp á svíninu.
„Þegar ég lék Rob í Pig þá fannst mér ég kominn eitthvert. Mér fannst ég vera meira ég sjálfur heldur en ég hef áður verið í kvikmynd. Kannski var ég ekki að leika. Mér fannst að ég væri að gera nákvæmlega það sem mér er ant um að gera. Ég held að þetta sé mín besta mynd.“
Þeir sem vilja sjá Nicolas Cage í kvikmyndahúsum núna geta skellt sér á myndina Reinfield þar sem Cage leikur hinn goðsagnakennda Drakúla greifa.
