„Ég giska aldrei rétt,“ sagði leikarinn Ken Jeong kampakátur í nýjasta þætti The Masked Singer.

Þættirnir eru einhverjir furðulegustu sjónvarpsþættir samtímans í Bandaríkjunum, en njóta jafnframt furðumikilla vinsælda. Níunda sería þáttanna hóf göngu sína á FOX 15. febrúar síðastliðinn og dómarar eru auk Jeong, söngkonan Nicole Scherzinger, söngvarinn Robin Thicke og leikkonan Jenny McCarthy Wahlberg. Kynnir er leikarinn og rapparinn Nick Cannon.

Þættirnir snúast um að frægir einstaklingar keppa við hvern annan í misgóðum söng íklæddir grímubúningum, sem eru oft algjör listaverk. Dómararnir giska á hver leynist á bak við gervið og áhorfendur velja hvaða þátttakandi tekur af sér grímuna í hverjum þætti. Einn stendur að lokum uppi sem sigurvegari.

Í öðrum þætti stigu tveir nýir á svið, Night Owl (Náttuglan) og Rock Lobster (Rokkhumarinn). Þema þáttarins var tónlist sænsku sveitarinnar ABBA og hóf þáttakandinn sem komst einn áfram eftir fyrsta þáttinn leik á að taka lagið Dancing Queen. Var viðkomandi í gervi Medúsu.

Náttuglan var næst á svið með lagið Fernando og sagðist viðkomandi hafa toppað vinsældalista aðeins 17 ára og rutt brautina fyrir söngkonur eins og dómarann Scherzinger, Britney og Christina Aguilera. Eftir nokkrar vísbendingar til viðbótar var ljóst að gisk á að viðkomandi væri Paula Abdul, Belinda Carlisle, Debbie Gibson og Kylie Minogue voru öll röng.

Rokkhumarinn var síðan síðastur á svið með lagið S.O.S. og sagðist hafa verið í kvikmyndum og sjónvarpi frá því að áhorfendur voru á barnsaldri og sagðist ekki trúa því að 10 milljón manns horfðu á hann dansa daglega í 15 sekúndur. „Mér líður eins og ég sé prinsessa í ævintýri.“ Giskað var á leikarinn Martin Short, grínistann Howie Mandel og fleiri.

Að lokum fór svo að Rokkhumarinn fékk fæst stig og þurfti að taka af sér grímuna. Reyndist það vera grínistinn Howie Mandel, sem Jeong hafði giskað á. „Ég giska aldrei rétt,“ sagði Jeong og réði sér ekki fyrir kæti og hoppaði upp á dómaraborðið.