Áhrifavaldavinkonurnar Sunneva Einarsdóttir, Birgitta Líf Björnsdóttir, Magnea Björg Jónsdóttir, Ína María Norðfjörð og Kristín Pétursdóttir sögðu skilið við kuldann á Íslandi í gær og flugu til Las Palmas, höfuðborgar Gran Canaria.

Ferðin er í samstarfi við Heimsferðir en ferðaskrifstofan er rækilega merkt færslunum þeirra í Story á Instagram. Þær eru allar með stóran fylgjendahóp á miðlinum en af þeim er Sunneva með flesta fylgjendur, tæplega 57 þúsund. Birgitta Líf með rúmlega 29 þúsund fylgjendur og Magnea með tæplega 28 þúsund.

Áhrifavaldarnir mynda saman hópinn LXS og eru með samnefnda raunveruleikaþætti á Stöð 2. Dansarinn Ástrós Traustadóttir er einnig hluti af hópnum en kom ekki með í utanlandsferðina þar sem hún eignaðist sitt fyrsta barn fyrr í mánuðinum.

Vinkonurnar klæddust peysum merktum LXS á leið út og aftan á þeim stendur: „Raunveruleiki leiðinlegasta fólks sem þú þekkir.“

Með þessari tilvitnun eru raunveruleikustjörnurnar að gera grín að gagnrýni Salvör Gullbrá Þórarinsdóttur á þáttunum sem setti allt á hliðina í september í fyrra.

Sjá einnig: LXS-dívurnar snúa vörn í sókn – „Ég er að borga þér nógu mikið“

Það er spurning hvort að hópurinn sé þarna til að taka upp fyrir nýja þáttaröð af LXS, sem er væntanleg í ár. Leikkonan og áhrifavaldurinn Kristín Pétursdóttir var ekki í fyrstu þáttaröð en er hugsanlega að hlaupa í skarðið fyrir Ástrós.