Love is Blind eru raunveruleikaþættir á Netflix með öðruvísi sniði en þessir „venjulegu“ stefnumótaþættir. Fyrsta þáttaröðin sló í gegn í byrjun árs 2020 og kom lokaþáttur annarrar seríu á föstudaginn síðastliðinn.
Í þáttunum fáum við að fylgjast með einstaklingum í leit að ástinni. Það sem gerir þessa þætti öðruvísi er að þátttakendur fara á stefnumót en sjá aldrei hvort annað, heldur tala þau í gegnum þunnan „vegg“ og par fær ekki að sjá hvort annað fyrr en það trúlofast.
Þættirnir gera tilraun til að svara spurningunni: „Er ást blind?“
Höskuldarviðvörun – hér að neðan koma upplýsingar um lokaþáttinn.
Deepti Vempati trúlofaðist Abhishek „Shake“ Chatterjee, kallaður Shake, í þáttunum.
En þegar þau voru komin upp að altarinu ákvað Deepti að velja sig sjálfa og sagði nei. Í gegnum allt ferlið og þáttaröðina hafði Shake ítrekað komið með einhverjar athugasemdir um útlit hennar. Hann talaði einnig mjög opinskátt um það, við aðra þátttakendur og myndavélina en ekki Deepti, að hann laðaðist ekki að henni kynferðislega.
Ákvörðun Deepti að „velja sig sjálfa“ var tekið fagnandi af áhorfendum og margir netverjar kalla hana „valdeflandi.“
Bróðir Deepti, Sunny Vempati, skrifaði færslu á Instagram þar sem hann tjáir sig um málið.
„Vá þvílíkur rússíbani sem þessi þáttaröð var,“ segir hann og bætir við við hversu stolt hann er af Deepti.
„Við vildum óska þess að þú hefðir ekki valið þennan trúð en þrátt fyrir barnaskap hans þá komst þú út úr þessum aðstæðum með höfuðið hátt og hélst áfram að trúa á það góða í fólki […] Við erum ótrúlega þakklát fyrir stuðninginn og kunnum að meta öll fallegu skilaboðin, við tökum þeim ekki sem sjálfsögðum hlut. Við erum búin að lesa allt of mikið af færslum á Twitter og skoðað of marga þræði á Reddit, og Deepti er svo heppin að hafa allt þetta stuðningsnet í kringum sig. Við erum mjög þakklát.“
Næst beinir hann orðum sínum að Shake. „Ég blanda mér venjulega ekki í drama en ég ætla að koma systur minni til varnar hérna. „Shake“, gaur, þú ert glataður. Þú reyndir að draga úr lífi systur minnar með því að koma með ömurlegar og asnalegar athugasemdir um hana. Þú komst með þessar athugasemdir, vitandi af því að móðir þín myndi einn daginn horfa á þættina, mínir foreldrar og öll fjölskyldan mín þurfti að horfa á þig tala illa um systur mína á bak við hana […] Þrátt fyrir athugasemdir þínar, bæði fyrir framan myndavél og ekki, þá gerði hún ekkert nema að sýna þér stuðning […] Þannig manneskju hefur hún að geyma.“
Sunny segir að þrátt fyrir staðhæfingar Shake, um að þættirnir voru klipptir saman svo hann myndi líta illa út, þá neyddi enginn hann til að segja það sem hann sagði. „Við opnuðum dyrnar að heimili okkar fyrir þér og þú sást það sem tækifæri til að öðlast frægð og frama, þannig afsakaðu að ég vorkenni þér ekki fyrir öll neikvæðu skilaboðin sem þú ert að fá. Gangi þér vel en ekki koma fokking nálægt systur minni.“
Deepti endurbirti færslu bróður síns og þakkaði fjölskyldu sinni fyrir stuðninginn.
