Áhrifavaldurinn Kate, sem er hvað þekktust sem @fullplatekate á samfélagsmiðlinum Instagram, fór á dögunum á nektarhátíð en hún segir frá þeirri reynslu í nýjustu færslu sinni á Instagram.

Hátíðin sem Kate mætti á nefnist Nudefest og er haldin í Somerset í Bretlandi. Um er að ræða stærstu nektarhátíð Bretlands en yfir 600 manns mæta á hátíðina ár hvert og skemmta sér saman.

Kate segir að það hafi verið valdeflandi að mæta á nektarhátíðina. „Ég sá svo mikið af líkömum. Þeir voru alveg einstakir og ALLIR fallegir,“ segir hún. „Ég elskaði að vera í kringum fólk sem virtist svo sjálfsöruggt og áhyggjulaust. Ég gerði mér grein fyrir því að líkamar eru bara líkamar, hylki sem við búum í.“

Það sem vakti sérstaklega athygli hjá áhrifavaldinum var það hve mikið af fólkinu á hátíðinni var með appelsínuhúð. „ALLIR voru með appelsínuhúð. Það gæti kannski ekki verið þinn tebolli og ef ég á að vera hreinskilin þá hélt ég líka að ég fílaði það ekki,“ segir hún.

„Hins vegar hefur hátíðin hjálpað mér með dýpstu líkamsímyndarvandamálin í undimeðvitundinni minni. Ég hef náð að sleppa takinu af þessum ótta við að vera dæmd af öðrum. Því í alvörunni, hverjum er ekki sama?“

Kate birti nektarmyndir af sér á Instagram er hún ræddi um hátíðina en hún þurfti að fela geirvörturnar á þeim því Instagram tekur ekki vel í þær, það er að segja ef þær eru kvenkyns. „Það er skömm að því að ég þurfi að fjarlægja geirvörturnar til að birta þessar myndir en ég er SVO ÁNÆGÐ að ég fór í þessa litlu myndatöku.