Að missa barnið sitt er með því sorglegasta sem getur komið fyrir fólk. Ástralski tónlistarmaðurinn Nick Cave hefur nú í tvö skipti þurft að ganga í gegnum þá sorg.

Fyrsti harmleikurinn átti sér stað í Brighton sumarið 2015. Þá féll Arthur Cave, sem þá var aðeins 15 ára gamall, niður af bjargi en hann hafði tekið inn ofskynjunarlyfið LSD áður en hann féll. Arthur var fluttur á sjúkrahús þar sem hann var síðar úrskurðaður látinn.

Nick Cave og fjölskylda hans fluttu til Miami í Bandaríkjunum í kjölfar slyssins. Í viðtali í fyrra sagði hann að Brighton hafi verið orðin „of sorgmædd“ fyrir fjölskylduna til að búa þar áfram. „Við komum þó aftur til Englands því við gerðum okkur grein fyrir því að við tókum sorgina með okkur, hvar sem við bjuggum.“

Andlát Arthus Cave veitti föður hans innblástur að plötunum Skeleton Tree and Ghosteen sem hann gaf út með hljómsveitinni sinni, Nick Cave & the Bad Seeds.

Lést tveim dögum eftir að hann losnaði úr fangelsi

Seinni harmleikurinn átti sér stað á dögunum en þá lést annar sonur Cave, Jethro Lazenby, aðeins 31 árs að aldri. Ekki er vitað hvers vegna hann lést en Nick Cave gaf út stutta yfirlýsingu vegna andlátsins í dag. „Með mikilli sorg get ég staðfest það að sonur minn, Jethro, er látinn,“ segir í yfirlýsingunni.

Jehtro hafði starfað sem fyrirsæta og leikari en undanfarnar vikur hefur hann setið í fangelsi. Í apríl á þessu ári dæmdur fyrir að ráðast á móður sína. Hann játaði að hafa ráðist á hana en lögmaður hans sagði fyrir dómi að hann þjáðist af geðklofa. Hann var sakfelldur fyrir að ráðast á hana en þó ekki af ásettu ráði.

Einungis tveir dagar voru síðan Jethro losnaði úr fangelsinu en hann hafði fengið að losna gegn tryggingu til að fara í meðferð.

Aðdáendur Nick Cave hafa rætt andlát Jethro á samfélagsmiðlum í dag. Þar votta þeir samúð sína og tala um hversu hræðilegt það sé að hann sé búinn að missa tvo syni sína. „Ég get ekki hugsað um aðra manneskju sem getur haldið í trú sína á heiminum eftir svona hræðilega atburði, þetta er svo gríðarlega sorglegt,“ segir til að mynda einn aðdáandi.

„Guð minn góður, hversu mikið þarf ein fjölskylda að ganga í gegnum? Hjartað mitt er í molum,“ segir svo annar.