Vestmanneyingar þurftu að bíta í það súra epli, annað árið í röð, að geta ekki haldið Þjóðhátíð um verslunarmannahelgina vegna fjöldatakmarkanna. Í ár kom það nánast ekki í ljós fyrr en á seinustu stundu að ekki væri hægt að halda hátíðina.

Það að geta ekki farið á Þjóðhátíð voru mikil vonbrigði fyrir þá gesti sem höfðu ætlað að leggja leið sína í dalinn og auðvitað fyrir Vestmanneyinga. Það að þurfa að aflýsa hátíðinni kemur sér illa fyrir ÍBV en Þjóðhátíð er stærsta tekjulind íþróttafélagsins.

Eins og frægt er orðið var brekkusöngurinn í Herjólfsdal sendur út í beinu streymi en engir áhorfendur máttu mæta í brekkuna og því þurftu Eyjamenn að dvelja heima og horfa á sönginn í sjónvarpinu.

Einn stærsti hluti hátíðarinnar er þegar kveikt er í brennunni á föstudegi. Eyjamenn vilja ekki sleppa henni og því verður bálið tendrað annað kvöld klukkan 21.

Samkvæmt gildandi sóttvarnarreglum mega 200 manns koma saman í hverju hólfi og því ættu Eyjamenn og þeir sem þangað eru komnir að geta horft á brennuna með eigin augum.