Kolbrún Birna H. Bachmann, laganemi og skipuleggjandi Druslugöngunnar, er nýjasti gestur Eddu Falak og Fjólu Sigurðardóttur í hlaðvarpsþættinum Eigin Konur.
Kolbrún Birna hefur um árabil verið ötul baráttukona gegn kynbundnu ofbeldi og er mjög virk á Twitter. Hún hefur látið hátt í sér heyra á miðlinum undanfarnar vikur við góðar undirtektir netverja.
Í þættinum deilir Kolbrún Birna sinni sögu sem þolandi ofbeldis. Þær ræða einnig um Sölva málið, sem markaði upphaf seinni #MeToo-bylgjunnar hérlendis.
Þykir mjög vænt um twitter í þessum baráttum, fyrsti vettvangurinn sem gerði mér kleift að opna mig um mín áföll. Það var eitthvað svo fallegt að sjá hvernig fullt af ókunnugu fólki sem þekkti mig ekkert, vissi ekkert um baksöguna mína eða hver ég er, var samt til í að trúa mér.
— Kolbrún Birna (@kolla_swag666) May 6, 2021
Kæru kallar sem börðust fyrir réttlætinu með kjafti og klóm fyrir 24 tímum gegn klikkuðu slúðurkonunum, af hverju hefur ekkert heyrst í ykkur þegar réttlætið snýr að réttindum þeirra kvenna sem brotið hefur verið á ítrekað? Hvað er það?
— Kolbrún Birna (@kolla_swag666) May 6, 2021
Edda spyr Kolbrúnu Birnu af hverju bylgjan hefði byrjað. „Fyrir mér þá byrjaði þetta í kringum þetta umtalamál í kringum 1. maí,“ segir Kolbrún og vísar í mál Sölva Tryggvasonar fjölmiðlamanns.
„Án þess að ætla að taka neina afstöðu um neitt sem gerist þar þá fór það ótrúlega mikið í mig að einhver maður sé ásakaður um eitthvað og hann geti tekið svo sinn platform sem er rosalega stórt podcast, þetta er nánast eins og að vera með fréttatíma á Stöð 2 og segir bara: „Ég er saklaus“ og fyrirsagnir á helstu vefmiðlum eru bara: „Sölvi Tryggvason er saklaus.“ Það er ekki staðreynd. Hann segist vera saklaus. Hann kveðst vera saklaus en það er enginn búinn að dæma hann. Þú ert ekki dæmdur saklaus, þú ert sýknaður. Það fór bara rosalega í mig hvernig hann gat einhvern veginn bara stigið fram og sagt ég er saklaus og þá bara komu bara mörg þúsund manns og sögðu: „Já auðvitað ertu það því þú ert svo góður. Þú ert svo myndarlegur að þú þarft ekki að nauðga.“ Ég bara [afsakaðu]. Minn nauðgari er frekar myndarlegur en hann gerir það samt,“ segir Kolbrún Birna.
„Mér finnst það líka mjög alvarlegt að ef það eru raunverulegar ásakanir eða mál í ferli þá er ótrúlega alvarlegt að stíga fram á undan þolandanum og segja : „Ég gerði ekkert en þolandinn er að reyna að sverta mannorð mitt.“ Þá er ótrúlega alvarlegt ef þeir taka undir það því þá erum við búin að draga undan stöðu þeirra þolanda sem stíga fram.“
Kolbrún Birna segir að það sé einnig mjög alvarlegt þegar fólk dæmir í málinu án þess að vita nokkuð um hvað hefði gerst. „Ekkert okkar var þarna og ekkert okkar veit hvað gerðist. Mér finnst það mjög alvarlegt eitt og sér,“ segir hún.
Í þættinum ræða þær einnig um tölfræðina fyrir karlmenn sem eru ranglega sakaðir um kynferðisofbeldi.
„Mér finnst líka mjög alvarlegt þegar fólk talar um falskar minningar og falskar ásakanir því þetta eru bara um tvö prósent ásakana sem eru í alvöru falskar, tvö til átta prósent. Þetta er fáránlega lágt hlutfall og ef þú hugsar um öll málin sem eru ekki kærð þá er þetta ennþá minna hlutfall. Það er alltaf gripið í þetta þegar er verið að ræða gegn þolendum, þegar við erum alltaf eitthvað að reyna að trúa þolendum og fólk segir hvað ef þessi er að ljúga. En það eru svo ótrúlega litlar líkur á því. Það að fara í gegnum kæruferli er svo ótrúlega þreytandi og þú þarft að gera svo ótrúlega margt, þú ferð á svo marga veggi. Það er enginn að gera þetta sér til gamans,“ segir hún.
Hlustaðu á viðtalið við Kolbrúnu Birnu í heild sinni hér að neðan.
