Á eignastofan.is birtist í dag ósköp venjuleg eign til sölu. Þriggja herbergja íbúð í Skipholti sem er heilir 162 fermetrar og með 29 fermetra bílskúr. Það er þó hvernig veggirnir eru skreyttir sem hefur vakið ákveðna athygli.

Á einhverjum veggjum eru gamaldags kertastjakar sem lýta út fyrir að eiga heima í kirkju á miðöldum. Á einum glugganum hangir glerlistaverk af Jesú Krist en það verður að teljast ansi magnað að á einum veggnum virðist vera gamaldags vopnasafn.

Þar má sjá sveðjur, samúraisverð, gamla riffla og eitthvað sem virðist vera gamall nautaatsbúningur.

Síðan má ekki gleyma samúraibrynjunni sem stendur forstofunni. Þú getur gerst eigandi íbúðarinnar fyrir litlar 82,9 milljónir en líklegt er að núverandi eigandi ætli ekki að skilja þessar fallegu minjar eftir.